Nyah Kotrik

 ~Nyah Kotrik~

Embuh piye critane kok isa diceluk nyah kotrik senajan jeneng asline Lasemi. Turunane tukang nganakne duit. Jenate Mbok'e sing jenenge Mbokdhe Sutik Brintik kondang dadi renternir sing mentalan. Yen ana wong sing telat nyaur utange anakan, embuh apa wae sakpethuke isa dicangking pinangka jaminan.

Ora ketang panci blirik, jarik utawa rantang.

Nyah kotrik pawakane cilik njuthil tipis sayik sayik, lakonane mekeh mekeh kaya bayi kesuwen dipekeh. Kulitane peteng rambute brintik kaya mbok'e. Tapi yen kadhung mbengok suarane banter, langak langak ora bisa dikalahne.

Ora beda karo jenate Mbok'e, Nyah Kotrik penggaweane uga nganakne duit, senajan neng omahe duwe toko pracangan. Yen isuk bakul janganan, wayah sore jam telunan mulai mubeng numpak sepedah Phoenix jengki biru nawarne dagangan karo nagih setoran. 

Sakliyane duit, apa wae dikreditne. Daster, sepatu tas lan seragame cah sekolah, jajanan lan ombenan yen ngadhepne riyaya nganti emas emasan manut jalukane wong desa.

Nyah Kotrik duwe anak papat, bojone wong teka luar Jawa. Pawakane gedhe kulitane resik semu abang lan omangane nganggo bahasa Indonesia. Deweke uga anak anake ora tau srawung karo tanggane.

Sing mbarep wedok lagek mlebu SMP.

Sing nomer loro uga wedok, isih kelas 5 SD, nomer telu karo papat lanang kabeh kelas 3 karo mancik kelas 1SD. Sing telu dadi siji sak sekolahan, pendhak isuk karo Nyah Kotrik dikarak mlaku bareng. Sing mbarep budhal sekolah numpak sepedah dhewe. Sing lanang ora genah nyambut gawene. Jarang ketok neng omah. Ana sing tau cerita jarene kerja neng Jakarta dadi sopire rumah sakit.

Ngadhepne jam telunan, srengengene isih padhang njingglang. Karo mekeh mekeh Nyah Kotrik nuntun sepedahe, gawa mbenthoyot nggonceng dagangane.

Gawe clana abang sepatonan srampat, wedhake mbeluk seje rupa antarane rai karo gulune. Bengese abang mbranang, alise njlirit dirupa ireng mung saklarikan.

Ora lali nyangklong tas isine duit karo buku cathetan.

"Kae lhooo... Nyah Kotrik yahmene wes mubeng nggoleki anake," Kang Bakir sing lagi nyukurne rambute neng ngisor waru celuluk merga ketok teka kaca.

"Sampean kok kaya ngerti ngertio wae to Kang," semaure Mas Supari Kenthos sing wes meh limang taun magrok neng ngisor waru mbukak potongan rambut. Banda kaca pangilon sing dicantholne ana wit waru lan kotak kayu kanggo nyimpen pirantine nyukur. 

Panggonane ora tau sepi, persis neng pojokan prapatan sing biasa digawe janggol tukang becak uga Mak Karni bakul rokok neng rombong surungan.

"Waaah iya, wes wayahe tanggalan. Nyah Kotrik kae mesti arep nagih mak'e cah cah," Suarane Lek Karjo kaya ngresula.

"Lha nyapo to Lek, kok ndadak golek utangan gone Kotrik," Mak Karni nyela nyela nakoni.

"Kepepet tak gawe sambang maratuwa sing nepaki lara nyang Madiun, Mak." Semaure Lek Karjo.

"Ngrolasi apa mira, Lek? Pitakone Kang Bakir karo ngebuti githoke merga kena rambut.

"Iyaa... ngrolasi, Kang. Tak mulih sik. Pancen ora ana apa apa yo tak banda semaya," jawabe Lek Karjo karo nyurung becake.

"Musuh Nyah Kotrik, utang dom nyaur cagak listrik." Mas Supari Kenthos celuluk karo ngresiki alat cukure.

"Jenenge wong yen ora semrambah, wingenane padu karo Rokayah gara gara setorane duit roti karo kuping gajah katut digawe, telat lek nguwehne. Dadi geger gedhen ngatut ngatutne mantu sak anak bojone." suarane Kang Bakir nginthik ngetan arep bablas tuku pakan manuk.

"Hayaaah...kok kaya ora tau weruh klakuane Kotrik, lumpraho ndog pitik sak tarangane tega digawa yen sampek ana sing telat nyaur utange." Mas Supari Kenthos ketok isih gregeten krungu kelakuane renternir desa sing canthas ladake ora ana tandhinge.

"Iki yo duite wong Sur, aja sakpenakmu dhewe muni rung nduwe. Biyen utange penak wayah nyaur malah ndadekne sikil, pokok tanpama bar Magrib kudu enek duit. Ora isa cicilane ya anakane. Kok nganti aku mengko mbalik panggah ora enek duit, sepedahe anakmu bakal tak jabel digawe tambel," Suarane Nyah Kotrik ketrek ketrek kaya gunung arep mlethek.

"Pak'e janggolan sepi Nyah, pirang pirang ndina gak narik blas," semaure Surti bojone Lek Karjo karo melas.

"Aku ora urusan karo sepi apa ramene janggolan. Butuhku kowe ndang mbayar cicilan," semaure Kotrik ora duweni kawelasan.

Ora let suwe, lek Karjo ketok nyurung becake mlebu gang. Praupane ketok kesel tenan.

"Sesuk yen wes ana duit, kabeh tak saur tak pok'i Nyah," suarane Lek Karjo njajal semaya.

"Apa? Arep ngepoki? Kapan? Nyaur anakane wae kabotan kok kemlinthi arep nutup sak babok'e pisan." Suarane Nyah Kotrik saya gerok gerok ora karuan.

Sarehne pancen ora enek duit, sidane bar Magrib Kotrik mara maneh karo anake wedok. Sepedahe anake Lek Karjo sing bendina digawe sekolah kelakon dituntun tenan.

"Yungalaaaah kok ora nduwe tata krama ta Nyah, surup surup arep Magrib kok sik ndhodhoki lawange wong, Mur ora neng omah. Kawet wingi lunga karo Dibyo." Mbah Kamituwa Dhongkol metu teka njero omah nemoni dhayohe Mur karo Dibyo sing mondhok empok neng kidul omahe.

"Tirose ten pundi Mbah?" Pitakone Nyah Kotrik karo menggeh menggeh merga wes kekeselen mubeng nagihi duite sing dianakne nyang tangga tanggane.

"Aku ora takon, Mur pamitan karo nitipne kuncine lawang." Semaure Mbah Kamituwa Dhongkol ngempet semremet.

"Waaah, minggat apa ndelik tenan, pancen ya bajing@n," suarane Kotrik saya ndadi ora nduweni sopan.

"Kowe yen arep misuh bengok bengok aja neng latarku, kana ngaliha nyang lapangan," Mbah Kamituwa sing dhasare wong mapan ora sungkan nundhung Kotrik teka omahe.

Nyah Kotrik sing isih pegel lan nggondhok atine, ngluntrung mancal sepedahe karo gembremeng ora karuan.

"Matane picek tenan, danc#k njaran" lan sak renane pisuhan mbrudhul teka cangkeme sing ora nduweni aturan.

Wolak walike jaman, sing biyen rekasa mlarat saiki wis isa kecukupan. Sing biyen bendina mangan ati digodhak utangan anakan saiki wis isa lega olehe ambegkan.

Terus piye nasipe rentenier tukang ngutangne duit anakan kae?

Omahe Nyah Kotrik dijabel karo bank, amarga sertipikate dicekelne karo sing lanang kan ora isa nyaur cicilan.

Duit atusan yuta sing jarene digawe modal kerja gawe pabrik karo cina, kapusan digawa mlayu lunga.

Saking bantere pikir, sing lanang ngengleng edan ndleming ora gelem suwalan mlaku turut ndalan.

Anake sing mbarep bar lulus SMA mlayu lunga karo wong lanang ora karuan parane.

Sing nomer loro karo telu diopeni adike neng Balikpapan.

Sing cilik wayahe mlebu SMP tapi ora disekolahne, merga ora kuwat ragate.

"Bu, sewane kios wulan niki kula utang riyin nggih, bakulan sepi kawet ndikwingi," karo mundhuk mundhuk Nyah Kotrik mara nyang omahe Bu lurah sing nyewakne kiose kanggo bakulan bensin lan garingan.

"Yen durung ana ara apa apa, sing penting sesuk isuk gek ndang nyang puskesmas. Njaluk tamba ben ndang waras awake," semaure Bu lurah sing sajak ora tega nyawang kahanane Nyah Kotrik sing biyen tukang nylathu kaya layapan abang, saiki saya soyak sayik awake kuru garing watuke ngikil nganti kepoyoh poyoh neng suwale.

Tangga tanggane ora ana sing gelem aruh aruh.

Apa maneh kok nganti gelem sambang lan ngertakne.

Nyawang wae kaya kaya padha mburuhne.

Merga biyen saking jahat lan elek klakuane.

Nuwun🙏🙏🙏

Lisse

12/01/2022

Menawi kersa maos seratan-seratan lintune mangga dipun tiliki dhateng FB Sita Aulliya Utawi 👇👇👇https://sita-aulliya.blogspot.com/