Perawan Tuwek

 ~Perawan Tuwek~


Wis adate wong ndesa yen ana bocah wedok sing umure mancik rong puluhan nanging durung rabi, durung duwe bakal bojo utawa durung ana sing nakokne saperlu dilamar dadi bojone. Kaya- kaya dadi omongan kang bisa gawe isin lan wirange wong tuane.

Kenangapa kok anakku wedok durung payu?

Apa merga rupane ora pati ayu?

Apa merga tumindake kaku tur wagu?

Apa merga wong ora nduwe sing bakale mung ngaboti sanggane bakal bojone?


Nanging pitakonan kabeh kui ora dunung yen kanggone Mbak Maimunah. Wong tuane genah kalebu cukup. Sawahe jembar, sapine ana papat durung wedhus sing diopeni paron karo tangga-tanggane ora kitung cacahe. Omahe gedhong magrong-magrong tur latare jembar. Neng ngarepe ana wite jambu gelas loro, sing yen pas uwoh ketok abing -abing senajan ulere jaran sak driji-driji gedhene. Durung maneh kebonan mburi omahe sing ditanduri tela rambak, kasepe, kates uga ana wit klopo pitu sak pelem gadhunge.

Dhasare ya wong ndesa, sapa sing weweh bakale oleh. Sapa sing gelem njaluk bakale entuk. Ndelalah wong tuane Mbak Maimunah pancen yo awehan. Tangga teparo sak wayah-wayah isa melu ramban.


Mbah Dariman lan Mbok Sarnem nduweni anak papat. Kariasih sing mbarep wis rabi entuk tangga desa, lan manggon jejeran karo wong tuane.

Maryatun sing nomer loro uga wis rabi entuk Surabaya. Lan wis duwe omah sak manggone ana kana. Sing nomer telu lanang isih bujang. Jenenge Wagiyoto. Karan Giyoto Bogang merga untune sing tengah pancen bogang. Nyambut gawene dadi supir trek neng Malang.

Lha sing ragil iki sing rodok seje karo tunggale liyane.

Yen bocah telu kabeh kui nduweni sipat grapyak semanak kayadene wong tuane, tapi Mbak Maimunah ora nduweni.


Praupane mbresengut ora ana eseme, rambute ketel ngombak banyu sing bendinane dikuncit dadi siji neng mburi. Ngetokne bathuke sing nonong. Mulane karan Mbak Munah Banyak. Wis nonong kok ndelalahe mripate ngeleng pisan.

Kulitane kuning, pawakane ndeg rodok lemu tinimbang dulure liyane. Pancen ya bocah ragil mesthine kepama panganan teka wong tuane.

Sak liyane tani, mbok Sarnem uga nduweni bedag sak empyak neng pasar Ngaglik. Bakulan butuhan wedok, budhal isuk mulihe sore.


Sak tamate saka SMA swasta neng Kediri, mbak Maimunah ora nutukne sekolahe. Karepe pingin les potong rambut karo paes manten.

"Yen ora pingin nerusne sekolah, apa kowe gelem nerusne bakulane mbok'e neng pasar, langanan wis akeh. Pendak isuk kari ngladeni bakul janganan obrokan," tawane Mbok Sarnem nalika gesah karo anake.

"Ahhh...wegah mbok, ayu-ayu kok trima njunjungi bayem, kangkung klopo sak balane." Semaure Mbak Maimunah karo mbresengut. Pancen praupane dhasare ya ngono kui.

"Lha yen arep blajar maesi manten ki kudu ana turun lan japane lho nduk. Kaya Bu Mantri kae paes manten lawas turun teka ibune. Pancen keluwarga piyayi. Durung maneh rapalan dunga sing ora isa diwenehne wong liya kejaba turunane dhewe," Suarane Mbah Dariman menehi pituturan anake.

"Ahh...kok kaya arep dadi tukang netek borok wae ndadak ana dungane. Yen nuruti pikiran kuna, wong-wong sing padha les paes kae ora bakal payu yen bukak salon pak." Saurane Mbak Maimunah isih ngeyel sak penake.

"Maesi manten kudu ana rapalan dunga supaya mangklingi lan ketok mencorong ayu praupane." Imbuhe omongan saka bapake.

"Ahh...dunga apa, nyatane mantene lek Sukesi kae kok ya malah ayu asline," mbak Maimunah isih golek alasan.

"Kae ngono seje, kae manten wedok "thowoken" merga melu ewuh turut pawon," semaure Mbok Sarnem sing kawit maeng njeginggut nglempiti jarike.

"Alaaah, wis mbuh pak, mbok... Yen ora oleh blajar maesi aku tak neng omah wae dadi buruh momong anake Yu Kariasih," semaure Mbak Maimunah karo ngluntrung mlebu nyang kamare.

"Yen pancen wis dadi karepe, mbok ben wae to pakmu, wong nuruti karepe anak ki ora ana salahe to?" Suarane Mbok Sarnem semu kemba.

"Bocah perawan, yen saba kutha mengko patrape isa maleh bubrah mbokmu, kae contone,..anake Pariadi saiki gaweane clana cekak klambi potholan digoncengi lanangan," semaure Mbah Dariman menehi tuladha.

"Ya seje to pakmu, Maimunah aja mbok padakne karo Jumilah, yen kae pancen bocah owah ora genah." Mbok Sarnem menehi alasan.

"Mbuh piye-piye, aku ora ngolehi yen anakku ragil arep turut kutha mung mburu pingin dadi paes manten." Genah cuthel mbah Dariman ora ngolehi anake wedok dadi paes.


Neng kamare, mbak Maimunah mureb krekeb karo segak seguk ngebrolne tangise. Atine gela merga kekarepane ora disetujoni karo wong tuane.

Karepe yen isa nduweni kapinteran motong rambut lan paes, dheweke pingin mbukak salon neng ngarep omahe.

Latar jembar, manggon pinggir dalan pisan.

Saking pegel lan kuciwane atine, olehe nangis mureb nganti ket


uron.


Ana candhake

Lisse

01/01/2022

Komentar

Posting Komentar

Postingan populer dari blog ini

Terompah Kyai Ngabdulah

Gambar
 Terompah Kyai Ngabdulah Siji-sijine langgar sing ana ing desa wis katon sepi. Bocah-bocah sing biyasa ngaji, dina iki padha budhal menyang pondhok pesantren gedhe. Saperlu arep sinau olah ilmu kanuragan, kang diwulangake pendhak Jemuwah bengi. Pencak silat sing diwulangne dene Gus Mohtar, putrane Kyai Ngabdulah. Senajan ditempuh karo mlaku dhampyak-dhampyak sangu obor, nyatane anggone nglurug ilmu bocah-bocah kuwi ora nate kendhor. Nanging bengi iki, mbuh kena apa Mbah Yai Dulah kok kadingaren mbaleni nginguk langgare. "Woalah Cung, arep cerita apa kok nganti betah anggonmu  ndhepipis ana ngisor bedhug?" pitakone Mbah Yai sawise dhehem saka njabane pager. Sanalika praupane Kojin langsung pucet. Antarane wedi, isin lan kaget. Nanging kabeh wis diniati dene dheweke, yen bengi iki kudu ngakoni kesalahane.  "Ngapunten Mbah Yai, kula ingkang luput" kandhane karo ndhingkluk. Kopyahe sing wis mbulak lan lebus ambune diblusukne sajeru-jerune. "Lhooo, luput kena apa Cu...
Baca selengkapnya

Randha Bingung #8

Gambar
 *Randha Bingung* #8 Bu carik katon wis dandan mlipit. Jarik wiron, kebaya kutu baru ora keri selendhange. Tambah gandhes karo sanggul lan sandhal jinjite. Dina iki ana rapat gedhen ing kecamatan. Lurah lan carik sarimbitan arep lunga nekani undhangan. "Bas, kae becakku wis teka. Aku takbudhal sik ya," kandane Bu Carik marang adhine. "Yen butuh apa apa ngongkon Gendhon wae, dibengoki sing banter. Soale kupinge rodok budheg." Tambahe karo sripat sripit mbenakne jarike. "Mas Guntur ora bareng ta Mbak?" Pitakone Baskoro saka ndhuwur kursi rodhane. "Masmu mengko nyusul, bareng karo Pak Lurah," semaure Bu Carik sing wis lungguh ana becak. Latar jembar sing kebak kembang katon seger ijo ditambahi suwara ocehe manuk. Ana ing mbale omah gedhe, Baskoro lungguh ana kursi rodhane. Mripate ora owal nyawangi sikile sing di gips merga tiba kepleset ana jedhing omahe. Pancen balung wis ora enom maneh, ndadekne dengkule mesle lan kudu dioprasi supaya bisa bali...
Baca selengkapnya

Sukarni #5

Gambar
 ~Sukarni~ #5 Mulih saka warunge mak Suthup, Sukarni nampa dhayoh sing lagek jagongan karo bu Bambang. Pak Bambang ora neng omah amerga nepaki mlebu bengi. Wong lanang sing dikenal banget karo Sukarni lan keluwargane neng ndesa. "Lhooo, Mas Puad... sampeyan kok ngerti aku manggon neng kene," pitakone Sukarni sakwise nyalami dhayohe. "Aku wis paham ceritane, uga kedadeyane Kar. Lik Bagong uga wis cerita kanti tutug perkara dhompetmu iki," jawabe mas Puad karo ngelungne dhompete Sukarni sing isih utuh isine. "Sepurane yen rodok telat olehku nyusul kowe Kar, warunge ora bisa taktinggal." Mas Puad nggenahne yen sejatine wis sesasi kepungkur diparani karo Lik Bagong.  Sakliyane perlu mbalekne dhompet Sukarni, uga perlu menehi alamate pak Bambang. Saknalika Sukarni kelingan maneh marang lik Bagong. Nalika kepethuk ana gedhung biskop, banjur ngalih klepat ora bali senajan wis muni ngongkon ngenteni. "Ahhh....mbuh, ora urus. Sing penting dhompete lan mas Pu...
Baca selengkapnya