Godhong Garing

 ~ Godhong Garing~

Neng kene ana tetanduran gedhe

Ngadeg jejeg nduduhake blegere

Pang carang oyot sagodhonge

Katon ngrembuyung subur nyenengake

Sing katone mung mbegegeg

Tingarahe kaya mata miceg kuping mbudeg

Nanging sejatine kebak ngemu ilmu

Kang bisa kanggo tuladha lan sinau

Coba sawangen, senajanta godhong

Ing mangsa ketiga gogroge godhong jati

Ora merga wis ngarang banjur arep mati

Yen tetanduran wae bisa nduweni ngerti

Kadhingkala kudu kelangan yen pingin mukti

Coba nalaren, senajanta godhong

Paribasan godhong gogrog teka wit witan

Senajan remuk ajur kesiram udan

Nanging isih migunani kanggone liyan

Dadi rabuk bisa paring panguripan

Godhong kang teles antep mandhes

Nyawiji karo lemah bumi lan ngrembes

Katon ijo royo royo nyenengake mata

Gawe seger lan ayem padhange hawa

Uga bisa paring apa wae kang miguna

Coba pikiren, senajanta godhong

Aja nganti paribasane kaya godhong garing

Sing mung diobat abitne angin sumriwing

Suwarane kemresek mbrebegi kuping

Katone mumbruk nanging gombong enthing

Yen diceluk, gampang banget anggone nglumpuk

Yen disenggol, uga gampang banget anggone remuk

Yen diobong, ora nunggu suwe wis mubal geni lan keluk

Sejatine urip mung ana loro pilihan

Arep mlaku ing petengan apa ing padhangan

Arep tumindak ala apa nandur kabecikan

Kabeh gumantung manggon ing resiking ati

Kang tansah ora bisa goroh lan ngapusi

Saiki, coba dirasa lan grahita

Godhong apa sing mbok pondhong lan gawa

Aja nganti kaya godhong sing garing

Cungkring mekingking senajan saka jati aking!!!

Nuwun 🙏🙏🙏

Lisse

01/02/2022