Dhukun Tiban 3

 Dhukun Tiban 3


      "Waaah ... Karimin oleh As, tombokane cocog patang angka," bengoke Suraji ana ing parkiran lapangan.

"Mosok ... kok bisa ces pleng olehe nyepi nengendi?" Pitakone hansip Saipul antara kaget lan pingin.

"Krungu-krungu ngramesi dhewe saka kodhe alam dhukun tiban," jawabe Suraji.

Sidane isuk-isuk kabeh padha rame, gara-gara tombokane buntut Karimin perot nyanthol patang angka. Lan jenenge Darso dadi tambah kegawa-gawa. 

"Pokok sakunine Darso, kuwi rungokno." Kandhane Karimin perot. Praupane sumringah bungah, sebab nampa dhuwit hadiah undian PORKAS.


           Lan kabar Darso bisa menehi kodhe alam saya rame. Ora mung bisa nambani, nanging uga bisa menehi nomer kanggo wong sing seneng tombok nomer.

"Waaah, kok kados makani kethek to Mbah. Ndadak mbeta gedhang barang." Celukuke Darso marang salah sijine "pasiene" sing nrengguluk gedhang saktundhun.

"Lha gadhahe namung niku lho Mas," semaure si Makdhe karo ndrenges.

"Pul ... kethek karo gedhang." Bisike Suraji marang hansip Saipul.

"Beres," semaure Saipul karo nduduhne jempole.

"Berarti 23," imbuhe Suraji.

"Saking pundi Pak," pitakone Darso marang wong lanang sing isih katon gagah senajan wis tuwa.

"Surabaya Mas," semaure si bapak karo setengah pincang.

"Rematik nggih," pitakone Darso.

"Sakjek pensiun, dengkul rasane kaya njarem keju linu."

"Pensiunan napa Pak?" Pitakone Darso.

"Rumiyin dhines teng Polda," si bapak nggenahne karo mapan lungguh ana sisihe Darso.

"Waaah polisi malih, ingkang nembe ugi polisi. Nanging saking Nganjuk," kandhane Darso. 

"Sssst ... polisi Git," celuluke Sutikno Pitik marang Gito sing uga melu njeginggut nunggoni wong golek tamba.

"Dudu 09 ... Tik, ketoke ngeban, bar polisi kok polisi maneh, berarti ngeban," semaure Sutikno nduweni penemu dhewe.

Nyatane ngadhepne jam rolas bengi, metune ngeban tenan.

Lan ramesane Sutikno sing pener, kodhe alam polisi ngeban.

Saknalika Sutikno mbeleh sepuluh pitik  dagangane, banjur dipanggang. Dipangan bareng saktanggane.

Amerga patang angka tembus saka ngramesi omongane dhukun tiban.

0923!!!


              Gerimis isuk kaya-kaya mbarengi jago sing kluruk. Lan kaya biyasane, polahe panguripan ing desane Darso wis diwiwiti. Ana sing budhal nyang pasar adol janganan, ada sing arep buruh tandur lan ndhaut, ana sing nyikar, ana sing bakulan panganan lan butuhan lan sakpituturute.       

Nanging, ramene dhukun tiban saya ora karuwan, wong sing golek tamba lan sing seja ngramesi omongane Darso pinangka golek angka uga durung suda. Saiki ketambahan cerita anyar.

"Kok nganti mondhok, sampean asli pundi to Mbak Ida?" Pitakone mbokdhe Tumini marang dhayohe.

"Kula asli Mojokerto, Budhe." Semaure Ida.

"Lha badhe madosne tamba sinten? Wong Sampeyan ki ketingale seger waras!" Pitakone mbokdhe Tumini.

"Anu ... anu, Budhe ... badhe pados bojo, awit mpun tigang dada langkung," semaure Ida karo semu isin.

"Woalaaaaah ... takdongakne ndang pethuk ya Ndhuk!" Kandhane mbokdhe Tumini.

"Matur nuwun, Budhe," pamite Ida karo nyalami mbokdhe Tumini. Wong randha sing omahe katut kecipratan rejeki dhukun tiban, merga disewakne gawe pondhokan.


         Lapangane wis rame. Mbak Ida katon melu uyel-uyelan karo liyane. Nalika antri njupuk nomer, dheweke ngarep mburi karo wong lanang klimis tur necis.

Sepaton, clanan komprang, klambine lengen dawa dilinting sakpertigan lan kacamatan ireng pisan. Sajak mesam mesem nyawang mbak Ida sing pancen dasare ayu lan pawakane gedhe dhuwur. Rambute kritingan sakpundhak, nyangklong tas lan sepaton srampatan.

Wong loro kuwi ora ketok kaya liyane. Sing kating krempis nyangga larane.

Seje dhewe!!!

"Mbak, sakit napa?" Pitakone wong lanang klimis kanti sopan.

"Mboten sakit Mas, namung badhe nyuwun donga," semaure mbak Ida.

"Donga napa?" Pitakone si klimis.

"Kersane lancar ... lancar jodho," mbak Ida ndhingkluk karo mesem semu isin.

"Lhaaa, ... lha kok padha karo aku, apa kira-kira jodhone awake dhewe dipethukne ana kene yo?" Suwarane klimis katon bungah sumringah.

Sawetara mbak Ida isih kamidlongopen merga ora nyangka yen ana sing duweni tujuwan padha.

Kepiye sakbanjure ceritane?

Tunggu ... ana candhake!


Geschreven door Sita Aulliya 

Amsterdam 

20-01-2022


Komentar

Posting Komentar

Postingan populer dari blog ini

Terompah Kyai Ngabdulah

Gambar
 Terompah Kyai Ngabdulah Siji-sijine langgar sing ana ing desa wis katon sepi. Bocah-bocah sing biyasa ngaji, dina iki padha budhal menyang pondhok pesantren gedhe. Saperlu arep sinau olah ilmu kanuragan, kang diwulangake pendhak Jemuwah bengi. Pencak silat sing diwulangne dene Gus Mohtar, putrane Kyai Ngabdulah. Senajan ditempuh karo mlaku dhampyak-dhampyak sangu obor, nyatane anggone nglurug ilmu bocah-bocah kuwi ora nate kendhor. Nanging bengi iki, mbuh kena apa Mbah Yai Dulah kok kadingaren mbaleni nginguk langgare. "Woalah Cung, arep cerita apa kok nganti betah anggonmu  ndhepipis ana ngisor bedhug?" pitakone Mbah Yai sawise dhehem saka njabane pager. Sanalika praupane Kojin langsung pucet. Antarane wedi, isin lan kaget. Nanging kabeh wis diniati dene dheweke, yen bengi iki kudu ngakoni kesalahane.  "Ngapunten Mbah Yai, kula ingkang luput" kandhane karo ndhingkluk. Kopyahe sing wis mbulak lan lebus ambune diblusukne sajeru-jerune. "Lhooo, luput kena apa Cu...
Baca selengkapnya

Randha Bingung #8

Gambar
 *Randha Bingung* #8 Bu carik katon wis dandan mlipit. Jarik wiron, kebaya kutu baru ora keri selendhange. Tambah gandhes karo sanggul lan sandhal jinjite. Dina iki ana rapat gedhen ing kecamatan. Lurah lan carik sarimbitan arep lunga nekani undhangan. "Bas, kae becakku wis teka. Aku takbudhal sik ya," kandane Bu Carik marang adhine. "Yen butuh apa apa ngongkon Gendhon wae, dibengoki sing banter. Soale kupinge rodok budheg." Tambahe karo sripat sripit mbenakne jarike. "Mas Guntur ora bareng ta Mbak?" Pitakone Baskoro saka ndhuwur kursi rodhane. "Masmu mengko nyusul, bareng karo Pak Lurah," semaure Bu Carik sing wis lungguh ana becak. Latar jembar sing kebak kembang katon seger ijo ditambahi suwara ocehe manuk. Ana ing mbale omah gedhe, Baskoro lungguh ana kursi rodhane. Mripate ora owal nyawangi sikile sing di gips merga tiba kepleset ana jedhing omahe. Pancen balung wis ora enom maneh, ndadekne dengkule mesle lan kudu dioprasi supaya bisa bali...
Baca selengkapnya

Sukarni #5

Gambar
 ~Sukarni~ #5 Mulih saka warunge mak Suthup, Sukarni nampa dhayoh sing lagek jagongan karo bu Bambang. Pak Bambang ora neng omah amerga nepaki mlebu bengi. Wong lanang sing dikenal banget karo Sukarni lan keluwargane neng ndesa. "Lhooo, Mas Puad... sampeyan kok ngerti aku manggon neng kene," pitakone Sukarni sakwise nyalami dhayohe. "Aku wis paham ceritane, uga kedadeyane Kar. Lik Bagong uga wis cerita kanti tutug perkara dhompetmu iki," jawabe mas Puad karo ngelungne dhompete Sukarni sing isih utuh isine. "Sepurane yen rodok telat olehku nyusul kowe Kar, warunge ora bisa taktinggal." Mas Puad nggenahne yen sejatine wis sesasi kepungkur diparani karo Lik Bagong.  Sakliyane perlu mbalekne dhompet Sukarni, uga perlu menehi alamate pak Bambang. Saknalika Sukarni kelingan maneh marang lik Bagong. Nalika kepethuk ana gedhung biskop, banjur ngalih klepat ora bali senajan wis muni ngongkon ngenteni. "Ahhh....mbuh, ora urus. Sing penting dhompete lan mas Pu...
Baca selengkapnya